Meta l-Waqt Jogħtor

Il-paċi fl-aħħar tat-trejqa.

Din il-poeżija qrajtha waqt Jum Pembroke 2019 fl-4 ta’ Lulju. Dan huwa rikording sempliċi li għamilt bi tħejjija għal dan l-avveniment. Fil-verżjoni finali għażilt “fjur” minflok “fjuriet.”

Meta l-Waqt Jogħtor

Minn Triq il-Mediterran

nilwi għal ġot-trejqa tal-bużbież.

Geġwiġija ta’ zkuk u fjur

jiġġebbdu u jimbuttaw

biex jarawni nzappap lejn ix-xatt.

Nistenna l-karozzi ġejjin kontra,

ir-riħ kontra,

is-skiet kontra.

Nistenna l-waqt jogħtor.

Għad irid jogħtor l-aħħar darba,

jogħtor biss,

imma għalissa m’hemmx waqt eħfef minn dan.

Ix-xemx riesqa bil-mod lejn il-punent,

lejn il-Madliena.

Fuq il-bużbież,

fuq ix-xagħri,

fuq ir-ranges tas-suldati,

timponi l-unika liġi mingħajr virgoli

u mingħajr rimedji.

Jien nieżel lejn il-bajja ċkejkna

fejn jinġabar il-fdal ta’ jum ieħor.

Għad ninżel fil-qiegħ tal-blu jien ukoll,

bħall-balal tal-kanuni waqt it-taħriġ,

u kulma nħalli warajja xugaman u karkur.

Għad ngħaddi l-aħħar darba,

indur mit-triq tal-palm

għal ġol-mogħdija fuq ix-xagħri.

U la jkun hemm il-ħeġġa tax-xemx

u lanqas il-loppju tal-bużbież.

Ikun hemm biss il-waqt jogħtor,

it-tarf,

l-isturdament tal-Mediterran.

U l-paċi.

Adrian Grima | 2019


 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s